ಸೋಲು-ಗೆಲುವು

ನೋವನ್ನಡಗಿಸಿ ನಕ್ಕು ಸುಮ್ಮನಾದೆ
ನಿನಗೆ ಅರಿವಾಗಲಿಲ್ಲ
ಮೌನವನ್ನು ಕೊಂದು ಮಾತನ್ನು ಮುಕ್ತಗೊಳಿಸಿದೆ
ನಿನ್ನ ನಂಬುಗೆ ಹೆಮ್ಮರವಾಗಲಿಲ್ಲ..

ಪ್ರತಿದಿನವೂ ಸೋತೆ...
ನಿನಗಾಗಿಯೇ ಎಂಬ ಭ್ರಮೆಯಲಿ
ನೀನು ಗೆದ್ದೆ ಎಂದು ಬೀಗುತ್ತಿದ್ದೆ
ಆ ಭ್ರಮೆಯ ಒಣ ಪ್ರತಿಷ್ಠೆಯಲಿ...

ಮೌನ, ನೋವು, ಮಾತು
ಈಗ ಪರಸ್ಪರ ಕಾದಾಟಕ್ಕೀಳಿದಿವೆ...
ನಿನ್ನ ನಗು ಈ ತುದಿಯಿಂದ ಆ ತುದಿಯವರೆಗೂ
ಹರಿದು ಬೀಗುತ್ತಿದೆ ಮತ್ತೆ ಗೆದ್ದೆ ಎಂದು

ನನ್ನ ಬಂಜರು ಹೃದಯವನ್ನು
ತುಂಡು ತುಂಡಾಗಿ ಸೀಳಿ, ರಕ್ತವನ್ನು ಬಸಿದು
ನಿನ್ನ ನಗೆಯನ್ನು ಸಿಂಗರಿಸಿಕೊಂಡು
ಧೇನಿಸುತ್ತಿದ್ದೇನೆ...

ಇನ್ನೂ ನಿನ್ನ ಒಣಪ್ರತಿಷ್ಠೆ
ಒಲವೊಂದೆ ಗೆಲುವೆಂಬ ನನ್ನ ಭ್ರಮೆಯೂ ಬಲಿಯಲಿ ಎಂದು...